Decenarium ad festum Pentecostes praeparandum

(Incipit in die Ascensionis Domini et concluditur in Vigilia Pentecostes)

DIES SECUNDA

Deus, in adiutorium meum intende. R. Domine, ad adiuvandum me festina. V. Gloria Patri, et Filio, et Spiritui Sancto. R. Sicut erat in principio, et nunc et semper, et in sæcula sæculorum. Amen.

ACTUS CONTRITIONIS

Amantissime Pater, de omnibus peccatis meis doleo ex toto corde, quia te, Deum meum, infinitum bonum meum, iis tam turpiter offendi, Pretiosum Sanguinem Domini mei Iesu Christi abligurravi et Spiritum Sanctum contristavi. Ingemisco tamquam reus, culpa rubet vultus meus : supliccanti, parce Deus !

INVOCATIO

Veni, Sancte Spiritus. Veniat unio Patris, beneplacitum Verbi. Tu, Spiritus veritatis, es præmium sanctorum, refrigerium animarum, lux tenebrarum, pauperum divitiæ, amantium thesaurus, esurientium satietas, consolatio peregrinorum; tu denique ille es, in quo omnes thesauri continentur. Veni, qui descendens in Mariam fecisti, ut, carnem sumeret Verbum, atque in nobis operare per gratiam quod in illa es per gratiam naturamque operatus. Veni, sanctificator omnipotens æterne Deus: qui benedicis sanctum sacrificium missæ tuo sancto nomini præparatum, et fac ut corda nostra oblatio fit acceptablile Deo Patri Omnipotenti. Veni, qui es omnis castæ cogitationis alimentum, fons omnis clementiæ, omnis puritatis cumulus. Veni et in nobis absume quicquid impedit ne nos absumamur in te. Amen.

LECTIO PRO DIE SECVNDA

Ex actis Leonis PP. XIII

Iamvero Christi Servatoris, qui princeps pastorum est et episcopus animarum nostrarum, exempla Nos imitari, ipso opitulante, continenter studuimus; religiose insistentes idem ipsius munus, Apostolis creditum in primisque Petro, « cuius etiam dignitas in indigno herede non deficit » (S. Leo M. ser. II. in anniv. ass. suae). Hoc adducti consilio, quæcumque in perfunctione iam diuturna summi pontificatus aggressi sumus instandoque persequimur, ea conspirare voluimus ad duo praecipue. Primum, ad rationem vitæ christianæ in societate civili et domestica, in principibus et in populis instaurandam ; propterea quod nequaquam nisi a Christo vera in omnes profluat vita. Tum ad eorum fovendam reconciliationem qui ab Ecclesia catholica, vel fide vel obsequio dissident; quum hæc eiusdem Christi certissima sit voluntas, ut ii omnes in unico Ovili sub suo Pastore una censeantur. Nunc autem, quum humani exitus advenientem diem conspicimus, omnino permovemur animo ut Apostolatus Nostri operam, qualemcumque adhuc deduximus, Spiritui Sancto, qui Amor vivificans est, ad maturitatem fecunditatemque commendemus. Propositum Nostrum quo melius uberiusque eveniat, deliberatum habemus alioqui vos per sollemnia proxima sacræ Pentecostes de præsentia et virtute mirifica eiusdem Spiritus; quantopere nimirum et in tota Ecclesia et in singulorum animis ipse agat efficiatque præclara copia charismatum supernorum. Inde fiat, quod vehementer optamus, ut fides excitetur vigeatque in animis de mysterio Trinitatis augustæ, ac præsertim pietas augeatur et caleat erga divinum Spiritum, cui plurimum omnes acceptum referre debent quotquot vias veritatis et iustitiæ sectantur: nam, quemadmodum Basilius prædicavit, « Dispensationes circa hominem quae factae sunt a magno Deo et Senatore nostro Iesu Christo iuxta bonitatem Dei, quis neget per Spiritus gratiam esse adimpletas ? » (De Spiritu Sancto c. XVI, n. 39). Antequam rem aggredimur institutam, nonnulla de Triadis sacrosanctæ mysterio placet atque utile erit attingere. Hoc namque substantia novi testamenti a sacris doctoribus appellatur, mysterium videlicet unum omnium maximum, quippe omnium veluti fons et caput; cuius cognoscendi contemplandique causa, in cælo angeli, in terris homines procreati sunt, quod, in testamento veteri adumbratum, ut manifestius doceret, ab angelis ad homines Deus ipse descendit: « Deum nemo vidit unquam: Unigenitus Filius qui est in sinu Patris, ipse enarravit » (Ioann. I, 18). Quisquis igitur de Trinitate scribit aut dicit, illud ob oculos teneat oportet quod prudenter monet Angelicus : « Quum de Trinitate loquimur cum cautela et modestia est agendum, quia, ut Augustinus dicit, nec periculosius alicubi erratur, nec laboriosius aliquid quæritur, nec fructuosius aliquid invenitur » (Summ. th. 1 q. XXXI, a. 2 - De Trin. l. I, c. 3). Periculum autem ex eo fit, ne in fide aut in cultu vel divinæ inter se Personæ confundantur vel unica in ipsis natura separetur ; nam, fides catholica hæc est, ut unum, Deum in Trinitate et Trinitatem in unitate veneremur. Quare Innocentius XII, decessor Noster, sollemnia quædam honori Patris propria postulantibus omnino negavit. Quod si singula Incarnati Verbi mysteria certis diebus festis celebrantur, non tamen proprio ullo festo celebratur Verbum, secundum divinam tantum naturam: atque ipsa etiam Pentecostes sollemnia non ideo inducta antiquitus sunt, ut Spiritus Sanctus per se simpliciter honoraretur, sed ut eiusdem recoleretur adventus sive externa missio. Quæ quidem omnia sapienti consilio sancita sunt, ne quis forte a distinguendis Personis ad divinam essentiam distinguendam prolaberetur. Quin etiam Ecclesia ut in fidei integritate filios contineret, sanctissimæ Trinitatis festum instituit, quod Ioannes XXII deinde iussit ubique agendum ; tum altaria et templa eidem dicari permisit; atque Ordinem religiosorum captivis redimendis, qui Trinitati devotus omnino est eiusque titulo gaudet, non sine cælesti nutu rite comprobavit. Multaque rem confirmant. Cultus enim qui sanctis Cælitibus atque Angelis, qui Virgini Deiparæ, qui Christo tribuitur, is demum in Trinitatem ipsam redundat et desinit. In precationibus quæ uni Personæ adhibentur, item de ceteris mentio est; in forma supplicationum, singulis quidem Personis seorsum invocatis, communis earum invocatio subiicitur; psalmis hymnisque idem omnibus præconium accedit in Patrem et Filium et Spiritum Sanctum ; benedictiones, ritus, sacramenta comitatur aut conficit sanctæ imploratio Trinitatis. Atque hæc ipsa iampridem Apostolus praemonuerat in ea sententia : “Quoniam ex ipso et per ipsum et in ipso sunt omnia ; ipsi gloria in sæcula” (Rom. XI, 36): inde significans Personarum trinitatem, hinc unitatem affirmans naturæ, quæ quum una eademque singulis sit Personis, ideo singulis, tamquam uni eidemque Deo, æterna æque maiestatis gloria debetur. Quod testimonium edisserens Augustinus, «Non confuse, inquit, accipiendum est quod ait Apostolus, ex ipso et per ipsum et in ipso ; ex ipso dicens propter Patrem, per ipsum propter Filium, in ipso propter Spiritum Sanctum» (De Trin. 1. VI, c. 10. - 1. I. c. 6).

(Hic gratias particulares postulari possunt)

PIÆ ASPIRATIONES AD SANCTVM SPIRITVM PRO SEPTENIS EIUSDEM DONIS IMPETRANDIS

I

Veni Creator Spiritus,

Mentes tuorum visita,

Imple superna gratia,

Quæ tu creasti, pectora.

Veni, ô Spiritus Sapientiæ ! Instrue cor meum, ut sciam æstimare et amare bona cœlestia, eaque terrenis omnibus anteponere. Monstra insuper viam, qua illa consequi, æternumque possidere valeam.

Pater noster, Ave Maria, Gloria Patri.

II

Qui diceris Paraclitus,

Altissimi Donum Dei,

Fons vivus, ignis, caritas,

Et spiritalis unctio.

Veni, ô Spiritus Intellectus ! Illumina mentem, ut omnia salutis Mysteria percipiam et amplectar, clareque tandem in lumine tuo lumen æternum videre, plenamque Tui, Patrisque ac Filii cognitionem obtinere merear.

Pater noster, Ave Maria, Gloria Patri.

III

Tu septiformis munere,

Ditus Paternæ dexteræ,

Tu rite promissum Patris,

Sermone ditans guttura.

Veni, ô Spiritus Consilii ! Assiste mihi in omnibus instabilis huius vitæ negotiis, mentem in bonum inclina, et a malo absterre, meque per rectum mandatorum tuorum tramitem ad optatum salutis æternæ metam dirige.

Pater noster, Ave Maria, Gloria Patri.

IV

Accende lumen sensibus,

Infunde amorem cordibus,

Infirma nostri corporis,

Virtute firmans perpeti.

Veni, ô Spiritus Fortitudinis ! Da robur cordi meo, illudque in omni perturbatione, et adversis casibus confirma, virtutemque contra noxios inimicorum meorum conatus largire, ne unquam victus, a te Deo summo bono meo separer.

Pater noster, Ave Maria, Gloria Patri.

V

Hostem repellas longius,

Pacemque dones protinus;

Ductore sic te prævio,

Vitemus omne noxium.

Veni, ô Spiritus Scientiæ ! Fac ut caduca huius mundi bona eorumque vanitatem perspiciam, et contemnam, neque aliter iis utar, quam ad tuam unius gloriam, meamque salutem ; tua vero æterna præmia omnibus rebus terrenis anteponam.

Pater noster, Ave Maria, Gloria Patri.

VI

Per te sciamus da Patrem

Noscamus atque Filium;

Teque utriusque Spiritum

Credamus omni tempore.

Veni, ô Spiritus Pietatis ! Cor meum ad veram pietatem, et sanctum Domini Dei mei amorem impelle, ut hunc in omni devotione mea semper quæram, et in vera dilectione inveniam.

Pater noster, Ave Maria, Gloria Patri.

VII

Deo Patri sit gloria,

Et Filio, qui a mortuis

Surrexit, ac Paraclito

In sæculorum sæcula. Amen.

Veni, ô Spiritus Timoris Domini ! Confige timore tuo carnes meas, ut provideam te Dominum meum in conspectu meo semper, omniaque sollicite caveam, quæ purissimis divinæ Maiestatis tuæ oculis displicere possunt.

Pater noster, Ave Maria, Gloria Patri.

V. Veni, Sancte Spiritus, reple tuorum corda fidelium.

R. Et tui amoris in eis ignem accende.

V. Domine, exaudi orationem meam.

R. Et clamor meus ad te veniat.

Oremus. Mentibus nostris, quæsumus, Domine, Spiritum sanctum benignus infunde, cuius et sapientia conditi sumus, et providentia gubernamur. Per Christum Dominum nostrum. R. Amen.

LITANIÆ DE SANCTO SPIRITU

Kyrie, eleison.

Christe, eleison.

Kyrie, eleison.

Spiritus Sancte, illumina nos.

Spiritus Sancte, veni in nos.

Pater de cælis, Deus, miserere nobis.

Fili, Redemptor mundi, Deus, miserere nobis.

Spiritus Sancte Deus, miserere nobis.

Sancta Trinitas, unus Deus, miserere nobis.

Spiritus Sancte a Patre Filioque procedens, miserere nobis.

Spiritus Domini, qui ferebaris super aquas in principio mundi, miserere nobis.

Spiritus Domini Deus Israël, miserere nobis.

Dominator hominum, miserere nobis.

Replens orbem terrarum, miserere nobis.

Habens omnem virtutem, miserere nobis.

Omnia bona operans, et omnia prospiciens, miserere nobis.

Ornans cælos, stabilis, et securus, miserere nobis.

Spiritus veritatis omnia suggerens, et distribuens, miserere nobis.

Spiritus sapientiæ et intellectus, miserere nobis.

Spiritus consilii, fortitudinis, scientiæ, et pietatis, miserere nobis.

Spiritus timoris Domini et prudentiæ, miserere nobis.

Spiritus, quo inspirante locuti sunt sancti Dei homines, miserere nobis.

Quæ ventura annuntias, miserere nobis.

Donum et promissio Patris, miserere nobis.

Spiritus Sancte Paraclite arguens mundum, miserere nobis.

Spiritus, in quo dæmonia eiiciuntur, miserere nobis.

Spiritus, ex quo renascimur, miserere nobis.

Spiritus, per quem caritas Dei diffusa est in cordibus nostris, miserere nobis.

Spiritus adoptionis filiorum Dei, miserere nobis.

Spiritus gratiæ et misericordiæ, miserere nobis.

Spiritus adiuvans infirmitatem nostram et reddens testimonium spiritui nostro, quod simus filii Dei, miserere nobis.

Spiritus suavis, benigne, super mel dulcis, miserere nobis.

Spiritus pignus hereditatis nostræ, deducens nos in terram rectam, miserere nobis.

Spiritus principalis, vivificans et confortans, miserere nobis.

Spiritus salutis, iudicii et gaudii, miserere nobis.

Spiritus fidei, pacis, et ardoris, miserere nobis.

Spiritus humilitatis, caritatis, et castitatis, miserere nobis.

Spiritus benignitatis, bonitatis, longanimitatis, ac mansuetudinis, miserere nobis.

Spiritus lenitatis, veritatis, unitatis ac consolationis, miserere nobis.

Spiritus compunctionis, promissionis, renovationis, ac sanctificationis, miserere nobis.

Spiritus vitæ, patientiæ, continentiæ, ac modestiæ, miserere nobis.

Spiritus omnium gratiarum, miserere nobis.

Propitius esto, parce nobis, Sancte Spiritus.

Propitius esto, exaudi nos, Sancte Spiritus.

A spiritu erroris, libera nos, Spiritus Dei vivi.

A spiritu immundo, libera nos, Spiritus Dei vivi.

A spiritu blasphemiæ, libera nos, Spiritus Dei vivi.

Ab omni obstinatione et desperatione, libera nos, Spiritus Dei vivi.

Ab omni praesumptione et veritatis contradictione, libera nos, Spiritus Dei vivi.

Ab omni malitia, et prava consuetudine, libera nos, Spiritus Dei vivi.

Ab invidia fraternæ caritatis, libera nos, Spiritus Dei vivi.

A finali impœnitentia, libera nos, Spiritus Dei vivi.

Per æternam a Patre et Filio processionem tuam, libera nos, Spiritus Dei vivi.

Per invisibilem unctionem tuam, libera nos, Spiritus Dei vivi.

Per omnem gratiarum plenitudinem, qua Virginem Mariam semper possedisti, libera nos, Spiritus Dei vivi.

Per supereffluentem sanctitatis abyssum, qua conceptione Verbi Matrem Dei inundare fecisti, libera nos, Spiritus Dei vivi.

Per sanctam in baptismo Christi apparitionem tuam, libera nos, Spiritus Dei vivi.

Per salutarem super apostolos adventum tuum, libera nos, Spiritus Dei vivi.

Per ineffabilem bonitatem tuam, qua Ecclesiam gubernas, concilias Præsides, Martyres corroboras, Doctores illuminas, Religiones instituis, libera nos, Spiritus Dei vivi.

Peccatores, Te rogamus, audi nos.

Ut in spiritu ambulemus, et desideria carnis non adimpleamus, Te rogamus, audi nos.

Ut Te numquam contristemus, Te rogamus, audi nos.

Ut omnes ecclesiasticos ordines in sancta religione, et vero spiritu conservare digneris, Te rogamus, audi nos.

Ut cuncto populo christiano cor unum et animam unam donare digneris, Te rogamus, audi nos.

Ut virtutem omnium complementum nobis donare digneris, Te rogamus, audi nos.

Ut nos exaudire digneris, Te rogamus, audi nos.

Spiritus Dei, Te rogamus, audi nos.

Agnus Dei, qui tollis peccata mundi, effunde in nos Sanctum Spiritum.

Agnus Dei, qui tollis peccata mundi, emitte in nos promissum Patris Spiritum.

Agnus Dei, qui tollis peccata mundi, da nobis spiritum bonum.

V. Spiritus Domini replevit orbem terrarum.

R. Et hoc, quod continet omnia, scientiam habet vocis.

Oremus. Adsit nobis, quæsumus Domine, virtus Spiritus Sancti: quæ et corda nostra clementer expurget, et ab omnibus tueatur adversis. Per Dominum nostrum Iesum Christum Filium tuum, qui tecum vivit et regnat in unitate eiusdem Spiritus Sancti, Deus, per omnia saecula saeculorum.

R. Amen.

V. Domine, exaudi orationem meam.

R. Et clamor meus ad Te veniat.

V Benedicamus Domino.

R. Deo gratias.

Et fidelium animæ, per misericordiam Dei, requiescant in pace. Amen.

Ignem sui amoris (†) accendat Deus in cordibus nostris. Amen. Ver menos